Seema Mishra Kurjan Скачать

सुपनो जगाई आधी रात में
सुपनो जगाई आधी रात में
तनै मैं बताऊँ मन की बात
कुरजां ऐ म्हारो भंवर मिलाद्यो ऐ
संदेशो म्हारे पिव ने पुगाद्यो ऐ

तूं छै कुरजां म्हारे गाँव की
लागे धर्म की भाण
कुरजां ऐ राण्यो भंवर मिलाद्यो ऐ
संदेशो म्हारे पिव ने पुगाद्यो ऐ

पांखां पै लिखूं थारै ओळमों
चान्चां पै सात सलाम
संदेशो म्हारै पिया ने पुगाद्यो ऐ
कुरजां ऐ म्हारो भंवर मिलाद्यो ऐ

लश्करिये ने यूँ कही
क्यूँ परणी छी मोय?
परण पाछे क्यूँ बिसराई रे?
कुरजां ऐ म्हारा भंवर मिलाद्यो ऐ

ले परवानो कुरजां उड़ गई
गई-गई समदर रे पार
संदेशो पिवजी गोदी में नाख्यो जाय
संदेशो गोरी को पियाजी ने दीन्यो जाय

थारी धण री भेजी मैं आ गई
ल्याई जी संदेशो ल्यो थे बांच
थे गोरी धण ने क्यूँ छिटकाई जी?
कुरजां ऐ साँची बात बताई जी

के चित आयो थारे देसड़ो
के चित आया मायर बाप
साथीड़ा म्हाने सांच बता दे रे
उदासी कियां मुखड़े पे छाई रे

आ ल्यो राजाजी थारी चाकरी
ओ ल्यो साथीड़ा थांरो साथ
संदेशो म्हारी मरवण को आयोजी
गोरी म्हाने घरां तो बुलाया जी

नीली घोड़ी नौ लखी
मोत्यां से जड़ी रे लगाम
घोड़ी ऐ म्हाने देस पुगाद्यो जी
गोरी से म्हाने बेगा मिलाद्यो जी

रात ढले राजाजी रलकिया
दिनड़ो उगायो गोरी रे देस
कुरजां ऐ सांचो कोल निभायो ऐ
कुरजां ऐ राण्यो भंवर मिलाया ऐ

सुपनो जगाई आधी रात में
तने मैं बतायी मन की बात
कुरजां ऐ म्हारा भंवर मिलाया ऐ
सुपनो रे बीरा फेरूँ-फेरूँ आजे रे